Pangarap Na Pasko
Dalawang taon nangulila
sa paskong nawala
nangagkulong na bigla
natakot at lahat nabahala
pasko'y di inalintana...
Pasko'y muling sisilip
dalawang taon ikinainip
pandemyang masungit
dasal sanay di umulit
para pamilya'y mayakap ulit.
Mga luha'y umaagos
sa puso'y tumatagos
pangungulila ng lubos
sa pamilyang naubos
parang kandilang naupos.
Pangako'y muli sumilay
mga bitui'y nagkamalay
hanging malamig humahampay
nagpaparamdam ng tunay
kapaskuha'y muling mabubuhay.
Liwanag nangagsitamlay
pangamba ang inialay
nakaraang pasko'y nahimlay
sa pangambang ikamamatay
ang makisalamuha sa buhay.
Ngayo'y may pumupuslit na pag-asa
sumisilay na ang ngiti at saya
kislap ng bumbilya'y nanghahalina
nakagagalak at nakasisiya
kapaskuha'y ramdam na...
Kaya't mga batang paslit
na aginaldo'y di nakamit
ngayo'y tiyak ng mangungulit
pagkat maaari nang ipilit
sariwain ang paskong sa kanila'y ipinagkait...
***
