Buhay Dalita
Bakit nga ba mahirap ang maging dukha?
Kahit di naman ito sinasadya
Kung ipanganak ka nga bang isang dalita
Dapat bang hamakin ka ng madla?
Sa panahon na akala'y madali ang lahat
Nuo'y mga mamahaling gamit
Ngayo'y makakamit kahit ng salat
Mga bagay kahit saa'y nagkalat.
Sikmurang gutom ay papawiin
Kahit piritong turon lamang kakainin
Dati'y saganang tubig ang inumin
Ngayo'y tinakal na'y mahal pa din.
Kasuotan ma'y maging marangya
Di pa rin ligtas sa pintas at pamamahiya
Ibinigay na nga ng iba na kusa
May presyo pa ring nagbabadya.
Hungkag na ba ang buhay sa mundo?
Di na masalamin totoong kinang sa ginto
Madalas di mo na rin mapagtanto
Kababawan ba o pag-iimbot lang ng tao.
Hindi na kayang tantyahin
Kahit pa taimtim na panalangin
Nang kahit sino pang madasalin
Mangingilag at mangingilag din.
Nakakalungkot ang bawat sitwasyon
Puro hapis kulang ang solusyon
Dahil na rin sa iba't ibang kondisyon
Masalimuot maski prusisyon.
Hindi naman dapat ikahiya
Kung ipanganak man sa lusak at dukha
Magsikap at magsipag kang kusa
Aapaw ang taos pusong biyaya.
Wag lang laman ng bulsa ang paapawin
Kagandahang asal din ay pairalin
Ugaling barumbado iyo ring baguhin
Magarang gamit di ito kayang burahin.
Magkusa kang magbago din
Pagpapakitang gilas inyo ring hawiin
Kalooban mo'y iyo lang sisikilin
Kung puro pagkukunwari ang lilingapin.
***
