Hapo
Hapo...
Ano ba ang sa'yo ay papawi
Luha ma'y di napapatid kung sawi
Anhin ba ang panyong di mahawi
Sukbit man sa balikat mong manipis na wari.
Hapong-hapo sa luha't pighati
Pagtangis di mawaglit kahit sumandali
Parang paghingang sa iyo'y nakatali
Pagkat may poot din na naghahari.
Kakayanin pa ba ang magtiis
Kung lahat sa'yo ay kinuha ng mabilis
Wala ng itinira'y sila pang nagmalabis
Pati tangan pang dasal na naghihinagpis.
Hapo sa damdamin ay umaapaw
Sa mata'y umaalpas at syang tanaw na tanaw
Hindi maikakaila pagkat mata'y nakaluwa
Maski luha ay lumalabas na kusa.
Kapag damdamin ay labis ng napagod
Pakiwari mo ba'y para ka ng tuod
Anuman ang naririnig at nakikita
Madalas ay wala ng halaga...
Ikaw ba'y nahahapo?
***
