Mahabaging Bathala
Maawaing Bathala
Ikaw nga po ang may likha
Langit man at lupa
Sayo lahat nagmula.
Bituin sa kalawakan
Maningning na kalangitan
Hangin sa himpapawiran
Halama'y nagsasayawan.
Mga puno ay kumakaway
Mga dahon winawagayway
Mga kawayan na yumuyukod
Sa halaman nakaluhod.
Mga ulap na mapuputi
Nagbibigay daan sa bahaghari
Pitong malinis na kulay
Pag-asang hatid ay tunay.
Mga hayop na naglipana
Hugis at galaw ma'y kakatwa
Ipinagkaloob ng kusa
Para makilala sa madla.
Mahabaging Ama
Sa tao ika'y di pabaya
Pagmamahal mo'y kusa
Nakalimot man silang di sadya.
